Niðurstöður könnunar

/0 Comments/by

Stjórn PSÍ gerði nýverið könnun á viðhorfi félagsmanna gagnvart starfsemi sambandsins á árinu 2019 og þeim mótum sem haldin voru á árinu.

M.a. var stuðst við niðurstöður könnunarinnar við ákvörðun um að bæta tveimur nýjum mótaröðum inn á mótadagskrána fyrir 2020 og ákvörðun um þátttökugjöld í þeim.

Einnig var spurt um hvað félagsmenn væru ánægðir með í starfseminni og hvað betur mætti fara.

Almennt ríkir mikil ánægja með störf stjórnar PSÍ á liðnu ári og má hér sjá nokkur dæmi um ummæli úr könnuninni:

  • “Þið eruð að gera flotta hluti”
  • “Flott stjórn, gerandi góða hluti”
  • “Jákvæð uppbyggingu frá ykkur, allt í rétta átt”
  • “Ánægður með alla vinnu sem þið skilið vel af ykkur”
  • “Flott utanumhald og virkari á samfélagsmiðlum”
  • “Stórkostleg stjórn og allt frábært !!! Takk fyrir !”
  • … og fleira í þeim dúr.

Og það var líka bent á margt sem betur mætti fara og hér er samantekt á því helsta sem var ítrekað nefnt í því samhengi:

  • Gjafaramálin voru ofarlega baugi en margir nefndu það sem stærsta úrlausnarefni komandi árs enda kom það verulega niður á framkvæmd Íslandsmótsins 2019 hversu fáa tókst að fá í störf gjafara.  Þegar er komið af stað umbótaverkefni sem snýst um að þétta samstarfið við gjafarahópinn, bæta greiðslustrúktúr þannig að hann hann hvetji fleiri til starfa fyrir PSÍ og einnig að auka fræðslu fyrir gjafara til að auka hæfni þeirra. Ef vel tekst til þá er enginn vafi á að við verðum í annarri og betri stöðu þegar kemur að næsta Íslandsmóti.
  • Nokkrir sögðust ósáttir við “rake-stefnuna” eins og þeir orðuðu það. Árið 2018 var tekin upp sú stefna að öll mót skyldu rekin án hagnaðar eða taps enda var lítið til í sjóðum PSÍ og ekki svigrúm til að taka neina fjárhagslega áhættu.  Það gerði það að verkum að kostnaðarhlutfall varð frekar hátt á fámennum mótum, eins og PLO Íslandsmóti og Stórbokka (í kringum 20%) en hóflegt á Íslandsmóti (15%) og síðan reyndar mjög lágt á Smábokka (9,5%).  Í upphafi 2019 var tekin ákvörðun um að bregðast við óánægjuröddum sem komu fram í könnun sem gerð var í lok 2018 og var bætt inn ákvæði í reglugerð PSÍ um mótahald þannig að hægt væri að gera undanþágu frá þessu á mótum sem fyrirsjáanlegt væri að yrðu fámenn.  Í kjölfarið var kostnaðarhlutfall sett í fasta upphæð á bæði Stórbokka og PLO mótinu 2019 og virðast þeir sem enn lýsa yfir óánægju með “hátt rake” ekki gera sér grein fyrir þessari breytingu.  Við munum halda áfram á þeirri braut að reka stóru mótin á sléttu með hóflegu eða jafnvel mjög lágu kostnaðarhlutfalli og síðan reka smærri mótin með föstu hlutfalli, jafnvel þótt það geti þýtt smá tap af þeim mótum.
  • Kynningarmál, ímynd og tengsl við fjölmiðla var oft nefnt að þyrfti að bæta. Á undanförnu ári höfum við lagt mesta áherslu á það sem mætti kalla innra kynningarstarf, þ.e. að efla þann hóp sem stundar sportið og hvetja fleiri til þátttöku.  Það hefur gengið vel og hefur orðið fjölgun á öllum mótum jafnt og þétt undanfarin ár.  Það að fara í ytra kynningarstarf og auka sýnileika pókers á Íslandi er annað og stærra verkefni og höfum við ekki getað sett það í forgang.  Við köllum eftir áhugasömum einstaklingum sem hafa áhuga og drifkraft í að koma að kynningarmálum fyrir sambandið og hvetjum að sjálfsögðu alla til þess að koma á aðalfundinn síðar í mánuðinum og taka þátt í umræðum um þetta og fleiri málefni þar.
  • Live feed/útsendingar frá mótum. Það geta allir verið sammála um að það væri til mikilla bóta að fá amk. video feed frá stærstu mótunum en hér strandar aftur á mannskap til þess að sjá um framkvæmdina.  Við köllum því enn og aftur eftir tæknisinnuðum og áhugasömum einstaklingum til að taka þetta að sér!
  • Nokkrir nefndu að það mætti hækka buy-in í mót, sér í lagi ÍM. Í mótadagskrá fyrir 2020 var tekinn sá póll í hæðina að hækka þátttökugjöld um ca. 25% yfir línuna, enda hefur t.d. þátttökugjald á ÍM lítið breyst í mörg ár.
  • Kynna betur og standa við dagsetningar á mótum. Þessu erum við að bæta úr núna með því að kynna mótadagskrá strax í fyrstu viku árs og kalla eftir athugasemdum um hana.
  • Og svo er það að lokum samstarfið við Coolbet sem margir áhugamenn um net-póker eru mis sáttir við. Staðan er einfaldlega svona:  Á síðustu árum hafa verið gerðar tilraunir til að ná samstarfi við nokkra af stærri aðilunum í þessum geira með misgóðum árangri.  Nokkrar tilraunir hafa verið gerðar til að ná sambandi við Pokerstars, en án árangurs.  Í síðustu tilraunum hefur tölvupóstum frá okkur ekki einu sinni verið svarað og við höfum því gefist upp á að reyna að ná sambandi við PS.  Við erum í góðu sambandi við tengiliði hjá PartyPoker og höfum haldið eitt mót í samstarfi við þá, ÍM í net-póker 2018 og gekk það mjög vel. En þeir hafa á hinn bóginn lýst því yfir að þeir geti ekki keyrt fyrir okkur undanmót fyrir live mót hjá PSÍ, einungis undanmót fyrir mót sem eru rekin á þeirra kerfi, eins og t.d. ÍM í net-póker.  Samstarfið við PP hefur verið mjög þungt í vöfum og hefur þurft langan fyrirvara og mikinn eftirrekstur til að koma mótum í kring sem þeir eiga að halda fyrir okkur og jafnvel þótt leitað hafi verið eftir því að fá að halda ÍM í net-póker 2019 með meira en mánaðar fyrirvara brunnum við inni á tíma vegna seinagangs hjá PP og því var leitað til Coolbet sem brást eldsnöggt við. Í sumar hafði samband við okkur nýr aðili, Betkings, sem notast við GG kerfið/clientinn.  Við eyddum umtalsverðum tíma í að reyna að koma á samstarfi við þá fyrir haustið þ.a. við gætum keyrt undanmót fyrir ÍM 2019 þar.  Rétt áður en fyrsta undanmótið átti að fara af stað kom í ljós að lokað var fyrir greiðslur inn á kerfi þeirra fyrir öll Mastercard kort á Íslandi og því féll samstarf við þá um sjálft sig.Og þá víkur sögunni aftur að Coolbet.  Við fórum fyrst í samstarf við Coolbet í aðdraganda Íslandsmóts 2018 og síðan aftur vikurnar fyrir Smábokka 2019.  Það gekk svosum á ýmsu, bæði komu upp tæknileg vandamál og ýmislegt annað fór úrskeiðis í uppsetningu móta og voru ekki allir allskostar sáttir með viðmót forritsins heldur, þannig að á þeim tíma olli það skiljanlega smá titringi að við skyldum reiða okkur á Coolbet í þessum efnum.  Meðal annars þess vegna var þess freistað að ná samstarfi við Betkings til þess að prófa annan aðila. En þegar þreifingar um samstarf við Betkings fóru út um þúfur leituðum við aftur til Coolbet og brugðust þeir skjótt við og vildu allt fyrir okkur gera og hefur allt samstarf við þá gengið eins og í sögu núna í haust.  Einnig hafa verið gerðar ýmsar endurbætur á hugbúnaðinum sem þeir notast við (Microgaming) og hafa ekki komið upp neinir tæknilegir örðugleikar svo við vitum af á síðustu mánuðum.  Í ljósi alls þessa ákváðum við að halda áfram samstarfinu við Coolbet og efla það enn frekar, m.a. með samstarfi um mótaröð sem fer í gang 12. janúar og stendur fram í lok mars 2020.  Við vonum að þeir sem gáfust upp á Coolbet í upphafi gefi þeim annað tækifæri og taki þátt í Coolbet bikarnum því það er ekki hægt að segja annað en að Coolbet sé að gera einstaklega vel við okkur með þeirri mótaröð.

Við vonum að þessi langloka varpi ljósi á ýmis mál sem brunnið hafa á vörum félagsmanna og við vonum jafnframt að okkur takist að gera enn betur á árinu 2020!

 

Coolbet bikarinn hefst á sunnudag!

/0 Comments/by

Fyrsta mótið í mótaröðinni Coolbet Bikarinn hefst á sunnudag kl. 20:00.  Þátttökugjald í hverju móti er €55 og er hvert mót fyrir sig leikið með freezout fyrirkomulagi, þ.e.a.s. ekki er hægt að kaupa sig inn aftur.
€50 fara beint í verðlaunafé rétt eins og í öðrum on-line mótum og síðan bætir Coolbet við glæsilegum vinningum í lokin til fjögurra stigahæstu spilaranna!
Sjá allar nánari upplýsingar um mótaröðina hér.

Undanmót kl. 18:00 á sunnudag!

Til að hita upp fyrir fyrsta mótið er tilvalið að skella sér í €5.50 re-buy undanmót til að næla sér í miða í fyrstu umferð Coolbet Bikarsins.  Hægt verður að kaupa sig tvöfalt inn auk þess sem add-on verður í boði þegar skráningarfresti lýkur.

Skráning í mótaröðina

Til að taka þátt í mótaröðinni þarf að skrá sig hér en það er, ásamt aðild að PSÍ, skilyrði fyrir þátttöku í stigakeppninni.  Aðrir geta tekið þátt í mótunum en þátttaka telur ekki til stiga fyrr en gengið hefur verið frá skráningu.

Mótadagskrá 2020

/0 Comments/by

Við byrjum með látum þetta árið en fyrstu mót ársins verða núna strax í janúar.  Hér má sjá mótadagskrá ársins eins og hún liggur fyrir nú en dagskráin er birt með fyrirvara um breytingar og viljum við biðja félagsmenn að rýna í hana og senda okkur athugasemdir sem allra fyrst ef þarna hafa verið valdar einhverjar óhentugar dagsetningar.

Við bætum nokkrum nýjungum inn á dagatalið og er óhætt að segja að hér sé verið að kynna metnaðarfyllsta dagatal sem PSÍ hefur skipulagt frá upphafi.  Við vekjum athygli á því að ekki er tryggt að þau mót sem bætt er inn á dagatalið nú verði inni á því til frambúðar en það fer að sjálfsögðu eftir þátttöku nú í ár.

Fyrst ber að nefna COOLBET bikarinn sem hefst núna 12.janúar.  Um er að ræða stigakeppni í röð 6 móta þar sem 5 bestu gilda og glæsileg aukaverðlaun verða í boði fyrir 4 stigahæstu keppendur í lokin.

Þann 19.janúar hefjum við síðan Bikarkeppni PSÍ.  Það er einnig stigakeppni þar sem bestu 5 af 6 freezout mótum telja til stiga og keppt verður um titilinn Bikarmeistari PSÍ 2020.

Í apríl gerum við tilraun með að bræða saman net-póker og live póker í nýju móti sem við köllum Bræðing.  Spilað verður niður í 8 manna lokaborð á netinu og síðan verður live lokaborð nokkrum dögum síðar.

Við viljum gjarnan auka þátt kvenna í mótum á vegum sambandsins og ef næg þátttaka næst þá blásum við til fyrsta kvennamótsins í sögu PSÍ í september.

Önnur mót verða á sínum stað og þess má til gamans geta að í byrjun febrúar munum við bjóða upp á free-roll mót fyrir félagsmenn þar sem 4 miðar á Smábokkann verða í boði en Smábokkinn fer síðan fram fyrstu helgina í mars.

Undanfarin tvö ár hefur aðsókn á öll mót á vegum PSÍ verið að aukast jafnt og þétt.  Við vonum að að allir finni eitthvað við sitt hæfi í þessari dagskrá og að við náum þriðja árið í röð að auka þátttöku í öllum mótum sem hafa verið fastir liðir í dagskránni hjá okkur!

Ársþing PSÍ 2020

/0 Comments/by

Ársþing Pókersambands Íslands 2020 verður haldið í Kornhlöðunni á veitingastaðnum Lækjarbrekku, sunnudaginn 26.janúar kl. 16:00.

Dagskrá verður skv. 6. grein laga sambandsins sem finna má hér á vef PSÍ.

Við hvetjum alla félasgmenn til þess að mæta hvort sem þið gefið kost á ykkur til starfa fyrir sambandið eður ei.

Lagðar verða fyrir þingið eftirfarandi lagabreytingar (viðbætur eru feitletraðar):

  1. Lagt er til að heiti 8.kafla laga PSÍ verði breytt í “8. kafli. Lagabreytingar og slit sambandsins.“
  2. Lagt er til að nýrri grein verði bætt við lög PSÍ sem hljóðar svo:
    “13. grein. – Tillaga um að leggja sambandið niður þarf að berast stjórn a.m.k. 3 vikum fyrir aðalfund og skal tillögunnar getið í fundarboði. Tillaga um að leggja sambandið niður telst aðeins samþykkt ef 3/4 atkvæðabærra fundarmana samþykkja tillöguna. Verði slík tillaga samþykkt skal boða til aukaaðalfundar innan 4 vikna til að staðfesta tillöguna og þarf jafnframt 3/4 atkvæðabærra fundarmanna þar til þess að staðfesta samþykki hennar. Verði sambandið lagt niður skulu eignir þess renna til verkefnisins “Frú Ragnheiður – Skaðaminnkun” á vegum Rauða Krossins í Reykjavík.“
  3. Lagt er til að 9. grein laga PSÍ verði breytt í:  (viðbótarákvæði um að heimild til að hafna aðild og hins vegar lágmarksaldur).
    “Til að teljast fullgildur meðlimur skal félagi hafa greitt árgjald til PSÍ á yfirstandandi ári. Þeir sem hafa greitt árgjald á undangengnu ári hafa atkvæðisrétt á ársþingi.
    Stjórn PSÍ áskilur sér rétt til þess að hafna aðild félaga sem á einhvern hátt hafa orðið uppvísir að agabrotum eða ósæmilegri hegðun á mótum á vegum PSÍ eða hjá aðildarfélögum/félögum sem PSÍ á í samstarfi við.
    Miða skal árgjöld við reikningsár sambandsins. Það er skilyrði fyrir þátttöku í mótum á vegum PSÍ, að viðkomandi félagi hafi greitt árgjald sitt til Pókersambandsins og hafi náð 18 ára aldri….…[restin er síðan eins] “.

Hlökkum til að sjá ykkur!

Stjórnin.

 

Úrslit á ÍM í net-póker 2019

/0 Comments/by

Það var hinn góðkunni Sævar Ingi Sævarsson sem hreppti Íslandsmeistaratitilinn í net-póker eftir rétt rúmlega fjögurra klukkustunda leik á Íslandsmótinu í net-póker sem fram fór á Coolbet í gærkvöldi.  Sævar hefur stimplað sig rækilega inn sem einn af okkar bestu spilurum en hann varð m.a. í öðru sæti á ÍM 2018 og vann sigur á Smábokkanum fyrr á árinu og er nú fyrstur til að sigra tvö mót á vegum PSÍ á sama árinu.

Alls tóku 48 þátt í mótinu og var heildarverðlaunafé €3840 og skiptist það á milli þeirra 8 efstu sem komust á lokaborðið.  Í skilmálum fyrir mótið var þess getið að hin réttu nöfn þeirra sem ynnu til verðlauna yrðu opinberuð og hér má sjá lista yfir verðlaunahafa á mótinu:

1. Sævar Ingi Sævarsson – Icepoker – €1248.00
2. Guðni Ólafsson – BOBBYGKILO – €806.40
3. Daniel Axelsson – Danzel – €576.00
4. Kristján Valsson – homer333 – €384.00
5. Edison Banushi – Landafylleri – €288.00
6. Hilmar Einarsson – Hestur123 – €211.20
7. Atli Thorsteinsson – ATLI950 – €172.80
8. Örn Árnason – orninn – €153.60

Við óskum Sævari Inga til hamingju með titilinn og þökkum öllum þátttakendum fyrir gott mót og Coolbet fyrir frábært samstarf við framkvæmd mótsins!

 

Íslandsmótið í net-póker 2019

/0 Comments/by

Mótadagskráin er ekki alveg búin þetta árið, en Íslandsmótið í net-póker er eftir og verður það haldið sunnudaginn 15.desember kl. 20:00.  Mótið fer fram á Coolbet að þessu sinni og verður buy-in €88 (€80+8).  Þetta verður deepstack mót með 15k upphafsstakk og 12 mínútna level og verður skráningarfrestur út level 8.

Nokkur undanmót verða haldin á Coolbet og fer það fyrsta fram núna í kvöld kl. 20:00. Síðan verða einnig undanmót á sama tíma á þriðjudag og fimmtudag kl. 20:00.  Þessi undanmót verða €5,50 re-buy mót með add-on og verða 2 miðar tryggðir í þeim öllum.

Á sunnudeginum 15.des verður undanmót kl. 18:00 sem verður með €16.50 freezout sniði. Síðan kl. 19:30, 19:40 og 19:50 verða €11 flip undanmót þar sem ein hendi ræður úrslitum og einn miði í verðlaun í hverju þeirra.

Ath. að nöfn vinningshafa verða gefin upp að móti loknu.

Sjá nánari upplýsingar hér:  https://www.coolbet.com/is/islandsmotid-2019

Örnólfur Smári er Íslandsmeistari í póker 2019!

/0 Comments/by
Örnólfur Smári Ingason er Íslandsmeistari í póker 2019!
 
Íslandsmótinu var að ljúka síðdegis á sunnudag eftir stutta og snarpa viðureign þeirra sem komust á lokaborð. Aðeins tók 3 og hálfa klukkustund að knýja fram úrslit en lokaborðið hófst kl 13:30 og síðasta hendin var gefin kl 16:59.
 
Örnólfur var með næststærsta stakkinn í upphafi á þriðja degi mótsins en þá voru 11 eftir. Hann komst svo upp fyrir Egil Þorsteinsson, sem var lengi vel með helming allra chippa í umferð, þegar hann tók út Magnús Böðvarsson sem endaði í 4.sæti og siðan Má Wardum sem lenti í 3.sæti.
 
Viðstaddir bjuggust þá við langri heads-up viðureign enda var meðalstakkur þá um 120bb. Það tók hins vegar aðeins hálftíma að klára heads-up viðureignina en þá endaði Egill all-in með AK á móti 77 hjá Örnólfi og sjöurnar héldu.
Alls tóku 119 þátt í mótinu og var þetta fjölmennasta Íslandsmót sem haldið hefur verið síðan 2015 en fjöldi þátttakenda hefur verið að vaxa jafnt og þétt síðustu 2 árin.  Verðlaunafé var samtals 6.110.000 kr. og skiptist á milli 18 efstu keppenda á eftirfarandi hátt:
  1. Örnólfur Smári Ingason, 1.500.000
  2. Egill Þorsteinsson, 950.000
  3. Már Wardum, 660.000
  4. Magnús Valur Böðvarsson, 530.000
  5. Ívar Örn Böðvarsson, 420.000
  6. Halldór Már Sverrisson, 330.000
  7. Inda Hrönn Björnsdóttir, 260.000
  8. Þorri Þorsteinsson, 200.000
  9. Gylfi Þór Jónasson, 200.000
  10. Hákon Baldvinsson, 150.000
  11. David Friðriksson, 150.000
  12. Steinn Thanh Du Karlsson, 120.000
  13. Rúnar Rúnarsson, 120.000
  14. Sævar Ingi Sævarsson, 120.000
  15. Agnar Jökull Imsland Arason, 100.000
  16. Styrmir Franz Arnarsson, 100.000
  17. Arnar Freyr Logason, 100.000
  18. Inga Guðbjartsdóttir, 100.000

Þess má geta að tveir komust á lokaborð annað árið í röð, þeir Ívar Örn Böðvarsson, Íslandsmeistarinn frá því í fyrra, og Þorri Þorsteinsson og verður það að teljast nokkuð merkilegur árangur. Og það þarf vart að geta þess að Örnólfur er yngsti Íslandsmeistari sem við höfum átt en hann á enn nær 3 mánuði eftir í tvítugt.

Segja má að mótshelgin hafi tekist frábærlega í nær alla staði og stjórn PSÍ vill þakka öllum sem tóku þátt í undirbúningi og framkvæmd mótsins kærlega fyrir vel unnin störf. Að sjálfsögðu hefðum við viljað fá fleiri gjafara til starfa en við þökkum þeim gjöfurum sem tóku þátt í þessu verkefni með okkur.
 
Viktor Lekve sá um mótsstjórn með glæsibrag og einnig Andri Geir Hinriksson sem stóð vaktina sem mótsritari og aðstoðardómari og er þetta í fyrsta sinn sem höfum mótsstjóra í móti á vegum PSÍ með TDA vottun en Viktor lauk því prófi nú í vikunni. Jón Ingi Thorvaldsson, gjaldkeri, sá um að stýra undirbúningi og skipulagningu mótsins og einnig komu Már Wardum, formaður og Einar Þór Einarsson, ritari að undirbúningnum og eiga þeir miklar þakkir skildar fyrir að koma þessu öllu heim og saman.
 
Hugaríþróttafélag Íslands fær bestu þakkir fyrir frábært samstarf en þar var þétt undanmótadagskrá sem skilaði 30 miðum í mótið, auk þess sem félagið útvegaði aðstöðu fyrir lokaborðið og 20k lokamót helgarinnar. Einnig hélt Spilaklúbbur Norðurlands röð undanmóta sem skiluðu 5 keppendum. Að auki áttum við mjög farsælt samstarf við Coolbet sem héldu alls 8 undanmót sem skiluðu 18 miðum. Coolbet bauð einnig upp á þá skemtilegu nýjung að leyfa veðmál á keppendur í mótinu. Vonandi verður hægt endurtaka það að ári. Og síðast en ekki síst þökkum við Dominos fyrir að fóðra starfsfólk alla helgina og keppendur á lokametrunum.  Alls komu 55 miðar út úr undanmótum í þetta sinn.
 
Við óskum öllum verðlaunahöfum til hamingju með árangurinn á mótinu og Örnólfi sérstaklega til hamingju með Íslandsmeistaratitilinn!!
 

 

Lokavikan fyrir ÍM 2019!

/0 Comments/by

Það verður mikið um að vera í þessari viku.  Þrjú undanmót eru eftir og auk þess fer COOLBET í gang með veðmál á leikmenn í mótinu nú í vikunni.

Dagskrá vikunnar er í megindráttum þessi:

Þriðjudagur 29.okt.

19:00 – Undanmót hjá Hugaríþróttafélaginu.  Ótakmarkað 5k re-buy með 2k add-on!

Miðvikudagur 30.okt.

19:30 – Undanmót hjá Spilaklúbbi Norðurlands, Akureyri, Ótakmarkað 5k re-buy með 2k add-on!

20:00 – On-line undanmót á COOLBET.  Ótakmarkað €33 re-buy í 60 mín. 10 mín level!

Fimmtudagur 31.okt.

19:00 – Undanmót hjá Hugaríþróttafélaginu.  Ótakmarkað 3k re-buy með 3k add-on!

Föstudagur 1. nóv.

17:00 – Íslandsmótið í póker hefst á Hótel Völlum, Hafnarfirði.  Allar nánari upplýsingar hér.

 

Við minnum á að þátttökugjaldið á ÍM hækkar í kr. 65.000 kl. 12:00 á hádegi á föstudag.  Þeir sem ekki ná í miða á undanmótum vikunnar eru hvattir til þess að ganga frá skráningu fyrir þann tíma.  Við hvetjum einnig alla til þess að nota DEBET kort frekar en kredit kort ef þess er kostur.  Það eru lægri færslugjöld af þeim þannig að það er öllum félagsmönnum til góða.

 

Allir sem hafa unnið miða í undanmótum eða hafa skráð sig á netinu áður en mótið hefst eru sjálfkrafa skráðir í mótið.  Það eina sem þið þurfið að gera er að ganga úr skugga um að búið sé að ganga frá árgjaldi til PSÍ þetta árið.  Síðan er bara að mæta á staðinn með skilríki með mynd (ökuskírteini/vegabréf) til að fá afhent mótsgögn.

Smellið hér til að ganga frá skráningu!

Gangi ykkur vel!

 

 

Undanmót fyrir ÍM 2019

/0 Comments/by

Fyrstu online undanmótin hefjast á morgun sunnudaginn 6.október kl. 20:00. Það er Coolbet sem sér um það fyrir okkur í ár, rétt eins og í fyrra. Mótin verða með €33 buy-in og hægt verður að kaupa sig inn aftur ótakmarkað fyrsta klukkutímann. Undanmót verða á Coolbet hvern sunnudag og miðvikudag kl. 20:00 fram að Íslandsmóti og verður einn miði tryggður í hverju móti.

Í fyrsta mótinu er sérstakur kaupauki fyrir þá sem skrá sig en með skráningu fylgir frímiði á mót sem fram fer á miðvikudag kl. 18:00 að íslenskum tíma. Í því móti verða m.a. í verðlaun pakkar á Premier League leik að eigin vali á tímabilinu Okt-Feb. Sjá nánar hér.

Hugaríþróttafélagið lætur ekki deigan síga og verður með undanmót alla fimmtudaga fram að ÍM og svo bætast einnig við mót á þriðjudögum síðustu vikurnar.  Mótin hjá Hugaríþróttafélaginu hefjast kl. 19:00.

Við hvetjum alla félagsmenn til að freista gæfunnar bæði á Coolbet og hjá Hugaríþróttafélaginu næstu 4 vikurnar. Það stefnir í frábært Íslandsmót en nú þegar eru mun fleiri komnir með miða á mótið en á sama tíma í fyrra!

Hótel tilboð vegna ÍM 2019

/0 Comments/by

Hótel tilboð vegna ÍM 2019 (English below)

Hótel Vellir býður félagsmönnum PSÍ eftirfarandi sérkjör á hótelherbergjum helgina 1.-3. nóvember:

Eins manns herbergi: 12.000 kr./nótt
Tveggja manna herb.: 14.500 kr./nótt

Til að bóka sendið tölvupóst á info@hotelvellir.com með eftirfarandi upplýsingum:
– Nafn
– Dagsetningar
– Hvort þið viljið eins eða tveggja manna herbergi.
– Takið fram að þið séuð að taka þátt í ÍM í póker!

Hótelið sendir ykkur síðan upplýsingar um hvernig gengið er frá greiðslu.

————————————–

Hotel offer for the 2019 Icelandic Poker Championship:

Hótel Vellir (the tournament venue) offers our members the following deal on hotel rooms:

Single room: 12.000 ISK/night
Double/Twin room: 14.500 ISK/night.

To make a reservation send an email to info@hotelvellir.com with the following information:
– Name
– Dates
– Type of room (single/double/twin)
– Mention that you are participating in the the Icelandic Poker Championship!

The hotel will then send you further information on how to complete the booking with a payment.