Tristan er Íslandsmeistari í póker 2026

Íslandsmótinu í póker lauk kl. 22:30 í kvöld og var það Tristan Ingi Ragnarsson sem bar sigur úr býtum eftir ca. hálftíma heads-up viðureign við Alexandru Marian Florea. Í þriðja sæti varð Fannar Ríkharðsson. Lokaborðið hófst kl. 14 og komu leikmenn inn á lokaborðið með 48bb meðalstakk og spiluðu í meira en 3 klukkustundir áður en fyrsti maður féll úr leik og muna menn ekki eftir annarri eins tregðu í upphafi lokaborðs fyrr eða síðar. Einhvern hitti það þannig á að litlu stakkarnir tvöfölduðu sig hvað eftir annað og það var ekki fyrr en um hálfsex sem Branimir Jovanovic féll úr leik í 9. sæti.

Heildarfjöldi þátttakenda var 140 og tók 76 þátt í degi 1a og 64 á degi 1b og komust samtals 64 þeirra á dag 2. Á degi 2 var leikið frá kl. 13:00 og til kl. 23:55 en þá stóðu þeir 9 eftir sem mynduðu lokaborðið.

Magnús Valur Böðvarsson mætti á staðinn bæði á degi 2 og 3 og var með beina textalýsingu frá lokaborðinu sem finna má hér.

Heildarverðlaunafé var 9.070.000 og skiptist það á milli 20 efstu sæta. Kostnaðarhlutfall mótsins var fest í 19% hámarki en heildarkostnaður var umfram það enda var umtalsvert meira lagt í framkvæmd mótsins að þessu sinni og mótshaldið því niðurgreitt að hluta.

Eftirfarandi skiptu með sér verðlaunafénu og Guðjón Þ. Gíslason sem endaði í 21. sæti (búbblusætinu) fékk í sárabætur miða á ÍM 2027:

1. Tristan Ingi Ragnarsson, 1.650.000
2. Alexandru Marian Florea, 1.220.000
3. Fannar Ríkarðsson, 930.000
4. Bjarni Fannar Bjarnason, 730.000
5. Steinar Geir Ólafsson, 580.000
6. Wilhelm Norðfjörð, 510.000
7. Andri Freyr Gunnarsson Bender, 440.000
8. Brynjar Valdimarsson, 390.000
9. Branimir Jovanovic, 340.000
10. Bjarni Daníel Ýmisson, 310.000
11. Kuba Jakubowski, 280.000
12. Elís Þór Sigurðsson, 250.000
13. Arnþór Freyr Sigþórsson, 220.000
14. Fionn Sherry, 200.000
15. Joshua Theilemann, 180.000
16. Logi Unnarson Jónsson, 180.000
17. Atli Þrastarson, 170.000
18. Dominykas Chrypa, 170.000
19. Gunnar Árnason, 160.000
20. Korneliusz Jelinski, 160.000
21. Guðjón Þ Gíslason, frímiði á ÍM 2027

Við þökkum Borg Restaurant kærlega fyrir þá frábæru aðstöðu sem við höfðum til afnota alla vikuna fyrir bæði Íslandsmótin, hliðarmótin og undanmót. Einnig þökkum við Coolbet og Reykjavík Royale fyrir samstarfið við framkvæmd mótsins. Undanmót á Coolbet voru klárlega lykilatriði í góðri þátttöku í ár og einnig undanmótin sem Hugaríþróttafélagið og Reykjavík Royale héldu og kunnum við þeim öllum bestu þakkir fyrir. Heildarfjöldi miða úr undanmótum var að þessu sinni 104 og er það mun meiri fjöldi en undanfarin ár.

Mótsstjórar voru þeir Jón Ingi Þorvaldsson og Steinar Snær Sævarsson og production manager var Snorri Már Skúlason. Í störfum gjafara var úrvalslið íslenskra gjafara, þau Alexander, Rannveig, Berglaug, Erika, Dísa Lea og Fanney auk þess sem okkur barst liðsauki frá Úkraínu og Hvíta-Rússlandi, þau Iryna, Iryna, Yuliia, Inna og Pavlo. Við kunnum þeim öllum bestu þakkir fyrir frábær störf.

Að lokum minnum við á að mótadagskránni er ekki alveg lokið enn. Íslandsmótin í net-póker eru eftir en þau fara fram sunnudagana 22.nóv. og 29.nóv. Undanmót fyrir þau hefjast á Coolbet nk. fimmtudag.

Alla mótsdagana í ÍM vikunni voru dregnir út €200 miðar í upphafi hvers móts til að hvetja mótsgesti til að mæta tímanlega, og einnig voru dregnir út miðar í late-reg hléi í hliðarmótum. Þeir heppnu sem unnu €200 á ÍM í net-póker voru:

• Grétar Már Steindórsson
• Trausti Pálsson
• Hannes Guðmundsson
• Sigurður Þorgeirsson
• Júlíus Pálsson
• Kirstján Loftur Helgason
• Kornelius Jelinski
• Ásgrímur Guðnason

Við óskum Tristan til hamingju með Íslandsmeistaratitilinn og öðrum verðlaunahöfum helgarinnar til hamingju með árangurinn, þökkum félagsmönnum fyrir frábæra þátttöku og hlökkum til að sjá ykkur á næsta móti!