(For information in English, click here)

Þetta árið sláum við í fyrsta sinn saman þremur mótum sem hafa verið á mótadagskránni, Bræðingi, Smábokka og Stórbokka og gerum úr því 5 daga pókerhátíð með nokkrum hliðarmótum.

Bræðingur hefur aðeins einu sinni verið haldinn áður en í því móti bræðum við saman net-póker og live póker í skemmtilegri samsetningu sem hefst á Coolbet sunnudaginn 1.júní og lýkur svo með live lokaborði miðvikudaginn 4.júní.

Á fimmtudeginum verður veglegt 40k mystery bounty mót þar sem Coolbet og PSÍ gefa glæsilega aukavinninga. Coolbet gefur €1600 pakka á Coolbet Open og PSÍ gefur aukamiða á Stórbokka.

Föstudaginn 6.júní hefst svo Smábokki með sama sniði og í fyrra þar sem dagur 1 er leikinn í einu lagi og dagur 2 hefst síðan kl. 16:00 á laugardeginum 7.júní.

Hátíðinni lýkur síðan með Stórbokka sem verður hápunktur vikunnar. Þátttökugjaldið er 150.000 kr. eins og fyrri ár og hægt að kaupa sig aftur inn ótakmarkað fyrir 120.000 kr. Innifalið í Stórbokka er vegleg þriggja rétta máltíð í hléi.

Sjá allar nánari upplýsingar á upplýsingavef hátíðarinnar (á ensku).

Síðustu undanmótin fyrir Smábokka og Stórbokka verða leikin samhliða Bræðingi, sunnudaginn 1.júní.

Agnar Jökull Imsland Arason (Aimsland) vann sigur á Íslandsmótinu í net-PLO (Pot-Limit-Omaha) sem fram fór á Coolbet nú í kvöld og lauk kl. 23:30. Agnar hefur náð frábærum árangri á mótum síðustu ára, bæði í net-heimum og raun-heimum. Hann varð Íslandsmeistari í póker árið 2023, í öðru sæti á ÍM 2021 og á lokaborði í báðum net-póker meistaramótunum 2023 auk þess að ná langt í fjölda annarra móta.

Agnar kom inn á lokaborðið með meðalstakk og var Rúnar Rúnarsson þá með yfirburðastöðu. Það var ekki fyrr en þrír voru eftir sem Agnar komst í forystu og náði að halda henni til leiksloka. Í öðru sæti varð Friðrik Falkner (MrBaggins) og Rúnar Rúnarsson (rudnar) í því þriðja. Í fjórða sætinu varð síðan Þórarinn Ólafsson Kristjánsson (GolliPolli) og hefur með því afrekað það að komast á öll lokaborð á öllum fjórum Íslandsmeistaramótum þessa árs.

Alls tók 36 þátt í mótinu og eru það tvöfalt fleiri þátttakendur en í fyrra (18) og mesti fjöldi sem vitað er um í þessu móti, Einnig varð nokkur fjölgun þátttakenda á ÍM í PLO sem fram fór í september og má etv. draga þá ályktun að áhugi á PLO sé að aukast. þátttökugjald í mótinu í kvöld var €100 og tryggði Coolbet verðlaunafé upp á €7500 í sárabætur fyrir ófarirnar sl. sunnudag og var því overlay upp á €1100. Verðlaunafénu var skipt á milli 9 efstu sem hér segir:

1. Aimsland – €2250
2. MrBaggins – €1500
3. rudnar – €1125
4. Gollipolli – €750
5. CASINOICE1 – €563
6. OtherFkr – €413
7. JesperSand – €338
8. Deingsi – €300
9. OkeyDude77 – €263

Við óskum Agnari til hamingju með glæsilegan árangur og þökkum félagsmönnum fyrir þátttökuna og þökkum Coolbet fyrir frábært samstarf við framkvæmd mótsins.

Jón Ingi Þorvaldsson (Thorvaldz) vann sigur á Íslandsmótinu í net-póker sem fram fór á Coolbet nú í kvöld og lauk kl. 00:24. Jón Inga þekkja eflaust flestir betur í öðru hlutverki en hann hefur oftar verið í mótsstjórahlutverkinu í mótum á vegum PSÍ undanfarin ár heldur en við pókerborðið, og var m.a. mótsstjóri á nýafstöðnu Íslandsmóti í póker og einnig PLO Íslandsmótinu sem fram fór í september.

Hann hefur þó einnig aðeins stimplað sig inn á listann yfir sigurvegara í mótum á vegum PSÍ í gegnum tíðina, m.a. með sigri á Stórbokka árið 2017 og einnig í eina Bikarmótinu sem PSÍ hefur haldið árið 2020. Aðspurður segist Jón Ingi ekki mikið hafa spilað á netinu undanfarið, “ég hef verið mikið á ferðalögum erlendis undanfarin misseri og lítið náð að spila yfir höfuð, og síst á netinu. En ég tók þann pól í hæðina í þessu móti að spila mjög tight, jafnvel meira en ég er vanur. Eftir rúmlega hundrað fyrstu hendurnar í mótinu var ég t.d. með VPIP í kringum 10% og þegar leið á mótið sveiflaðist það á milli 15 og 18% sem er alveg í lægra lagi. En umfram allt spilaði ég bara alveg sérlega agað og það bar árangur.”

Jón Ingi kom inn á lokaborðið aðeins undir meðalstakk og náði síðan að halda stöðu sinni meira og minna í gegnum allt lokaborðið og síðan hægt og bítandi klóra sig upp listann. Þegar 5 voru eftir var hann kominn í annað sætið og þegar aðeins þrír voru eftir náði hann yfirburðastöðu og að lokum varð heads-up leikurinn mjög stuttur og snarpur.

Í öðru sæti varð Guðni Rúnar Ólafsson, sem netverjar þekkja betur sem GkiloGKILO og var hann með chip-lead þegar komið var inn á lokaborðið. Hann hafði verið í einu af efstu sætunum í gegnum allt mótið eftir að hafa strax í upphafi móts tvöfaldað sig með því að slá út “Höfðingjann”. Í því þriðja varð síðan Þórarinn Ólafsson Kristjánsson, betur þekktur á Coolbet sem Gollipolli. Þórarinn hefur verið að gera það gott á þessu ári en hann getur nú státað af því að hafa náð lokaborði á öllum Íslandsmótum það sem af er árinu, en hann varð í 9.sæti á nýafstöðnu Íslandsmóti í póker og í 4.sæti á ÍM í PLO í september.

Alls tók 51 þátt í mótinu sem er umtalsverð fjölgun frá því í fyrra (34), þátttökugjald var €200 og endaði verðlaunapotturinn í €9282 sem skiptist á milli 8 efstu á eftirfarandi hátt:

1. Thorvaldz- €2970
2. GkiloGKILO – €1949
3. GolliPolli – €1392
4. rudnar – €937
5. flispeysupabbi – €705
6. doctorfree888- €520
7. galdrakall – €427
8. dsaliente – €381

Við óskum Jóni Inga til hamingju með glæsilegan árangur og þökkum félagsmönnum fyrir þátttökuna og þökkum Coolbet fyrir frábært samstarf við framkvæmd mótsins.

Íslandsmótinu í póker lauk kl. 20:08 í kvöld með sigri Hafþórs Sigmundssonar eftir nokkuð langa heads-up viðureign við Óla Björn Karlsson. Í þriðja sæti varð Andrés Vilhjálmsson. Það er skemmtileg tilviljun að þeir þrír skipuðu efstu þrjú sætin eftir dag eitt, en Hafþór kom síðan inn á dag 3 með minnsta stakkinn og náði að vinna hann upp jafnt og þétt allan daginn.

Heildarfjöldi þátttakenda var 125 og er það mesti fjöldi þátttakenda síðan 2015. Degi 1 var skipt í tvennt og tóku 66 þátt í degi 1a og 59 á degi 1b og komust samtals 69 þeirra á dag 2. Á degi 2 var leikið til miðnættis en búið var að ákveða að stöðva leik á miðnætti eða þegar komið væri niður í lokaborð og aðeins 9 eftir. Á miðnætti stóðu 10 eftir og höfðu þá leikið í meira en hálfa klukkustund hand-for-hand og var þá staðar numið og hófu þessir 10 leik á sunnudeginum. Það tók rétt rúma klukkustund að komast niður í 9 manna hópinn sem skipaði lokaborðið 2024. Það tók síðan tæpar 6 klukkustundir að leika mótið til þrautar þar til sigurvegarinn stóð einn eftir.

Þetta var í fyrsta skipti sem mótið var kynnt lítillega í alþjóðlegum grúppum pókeráhugamanna, m.a. í grúppu þeirra sem flakka um heiminn til þess að safna flöggum á Hendon Mob vefnum, eða svokölluðum “Flaghunters”. Á endanum komu 4 slíkir frá fjórum mismunandi löndum og þeirra á meðal var Lars Jurgens sem kemst nú í efsta sæti á þeim lista en hann hefur unnið til verðlauna á pókermótum í samtals 51 landi. Auk þess komu þrír leikmenn frá Kanada og tóku þátt í Íslandsmótinu og hliðarmótum. Það vakti einnig athygli skipuleggjenda að í mótinu voru að þessu sinni leikmenn búsettir á Íslandi frá amk. 11 öðrum löndum þannig að alls voru keppendur af 16 mismunandi þjóðernum í mótinu.

Heildarverðlaunafé var 8.620.000 og skiptist það á milli 20 efstu sæta. Kostnaðarhlutfall var 13,8% sem er það lægsta sem náðst á Íslandsmóti með því fyrirkomulagi sem viðhaft hefur verið síðustu 7 ár að reka mótið án hagnaðar eða taps, enda lækkar hlutfallið eftir því sem fleiri taka þátt í mótinu.

Eftirfarandi skiptu með sér verðlaunafénu og sá sem endaði í 21. sæti (búbblusætinu) fékk í sárabætur miða á ÍM 2025:

1	Hafþór Sigmundsson	1.800.000
2	Óli Björn Karlsson	1.350.000
3	Andrés Vilhjálmsson	1.000.000
4	Óskar Aðils Kemp	750.000
5	Jesper Sand Poulsen	580.000
6	Árni Gunnarsson	450.000
7	Mario Galic	370.000
8	Sigurjón Þórðarson	300.000
9	Þórarinn Kristjánsson Ólafsson	250.000
10	Sigurður Þengilsson	210.000
11	Seweryn Brzozowski	210.000
12	Ívar Örn Böðvarsson	180.000
13	Steinn Thanh Du Karlsson	180.000
14	Garðar Geir Hauksson	180.000
15	Vignir Már Runólfsson	150.000
16	Börkur Darri Hafsteinsson	150.000
17	Adam Óttarsson	150.000
18	Yuri Ishida	120.000
19	Branimir Jovanovic	120.000
20	Ingólfur Lekve	120.000
21	Fionn Sherry	Miði á ÍM 2025

Samhliða lokaborðinu var leikið 30K re-entry hliðarmót þar sem 29 tóku þátt og voru entry í mótið samtals 41. Verðlaunafé endaði í 1.045.000 og stóð til að skipta á milli 5 efstu sæta en leikmenn gerðu með sér samkomulag um að bæta við 3 auka verðlaunasætum. Það var Bjarni Þór Lúðvíksson sem bar sigur úr býtum í því móti og hlýtur að launum 390.000.

Mótsstjórar voru þeir Jón Ingi Þorvaldsson, sem einnig sá um skipulag og undirbúning mótsins, og Einar Þór Einarsson. Í störfum gjafara voru Alexander, Rannveig, Nikulás Kai, Berglind, Korneliusz, Edward, Berglaug, Erika, Silla, Bjarni Veigar, Kristján Bragi, Bart og Þorbjörg. Við kunnum þeim öllum bestu þakkir fyrir frábær störf.

Við þökkum Hugaríþróttafélaginu kærlega fyrir þá frábæru aðstöðu sem félagið veitti okkur til að halda mótið og auk þess fyrir frábæra undanmótaröð í allt haust en alls komu 80 miðar út úr undanmótum, þar af 52 úr mótum á vegum Hugaríþróttafélagsins. Einnig komu 24 miðar út úr undanmótum á Coolbet sem hefur eins og fyrri ár reynst okkur ómetanlegur bakhjarl og kunnum við þeim bestu þakkir fyrir frábært samstarf.

Að lokum minnum við á að mótadagskránni er ekki alveg lokið enn. Íslandsmótin í net-póker eru eftir en þau fara fram á Coolbet í lok nóvember og byrjun desember.

Við óskum Hafþóri til hamingju með titilinn og öðrum verðlaunahöfum helgarinnar til hamingju með árangurinn, þökkum félagsmönnum fyrir góða þátttöku og hlökkum til að sjá ykkur á næsta móti!