Já, Matte Bjarni Karjalainen gerði sér lítið fyrir og vann Stórbokkann líka, eftir að hafa tekið niður Smábokkann fyrir aðeins 4 vikum síðan. Þetta er í fyrsta sinn sem sami einstaklingur vinnur báða titlana sama árið, en áður hafði Sveinn Rúnar unnið báða titlana á sitt hvoru árinu og verður hvort tveggja að teljast magnaður árangur hjá þeim báðum. Það er líklega óhætt að segja að þetta sé lukkubolur, en Matte skartaði sama broskallinum fyrir fjórum vikum þegar hann sat fyrir á mynd sem sigurvegari Smábokkans 😉

Alls tóku 29 þátt í mótinu og voru auk þess 14 re-entry þannig að samtals voru 43 entry í mótið sem er besta þátttaka á Stórbokka síðan 2016! Verðlaunafé var samtals 5.235.000 og var kostnaðarhlutfall 13,2%. Verðlaunaféð skiptist á milli 6 efstu leikmanna sem hér segir:

1. Matte Bjarni Karjalainen, 1.500.000
2. Gunnar Árnason, 1.150.000
3. Wilhelm Nordfjord, 865.000
4. Jónas Tryggvi Stefánsson, 655.000
5. Tomasz Janusz Mroz, 565.000
6. Ingólfur Lekve, 500.000

Það var ekki annað að heyra á þátttakendum að rífandi ánægja hefði verið með mótið og það var ekki síst að þakka frábærri aðstöðu í nýjum salarkynnum Hugaríþróttafélagsins í Mörkinni 4.

Einar Þór, ritari PSÍ, stóð vaktina sem mótsstjóri með glæsibrag og Silla, Alexander og Þórunn sáu um gjafarastörfin af einstakri fagmennsku. Það var síðan Jón Ingi, gjaldkeri PSÍ, sem bar hitann og þungann af undirbúningi og skipulagi mótsins.

Við þökkum öllum sem tóku þátt í mótinu fyrir að gera þetta að jafn vel heppnuðum viðburði og raun bar vitni og Veislan.is fær bestu þakkir fyrir glæsilegan 3ja rétta kvöldverð sem þau báru okkur. Hugaríþróttafélagið á miklar þakkir skildar fyrir að leyfa okkur að vígja nýja húsnæðið með Stórbokkanum og við þökkum mótsstjóra og gjöfurum fyrir vel unnin störf!!

Við óskum Matte til hamingju með glæsilegan árangur og Hugaríþróttafélaginu með nýja húsnæðið.

Sjáumst í haust á Íslandsmótunum í PLO og NLH.

Smábokka lauk núna í kvöld með sigri Matte Bjarna Karjalainen. Matte hafði forystu eftir dag1, var enn með chip-lead á búbblunni þegar 8 voru eftir og sigldi stakknum sínum örugglega í höfn eftir heads-up leik við Benedikt Óskarsson sem hafnaði í öðru sæti.

Þátttakendur voru 40 talsins að þessu sinni og keyptu 13 sig inn aftur þannig að alls voru 53 entry í mótið. Kostnaðarhlutfall mótsins var fest í 15% og var það því lítillega niðurgreitt af PSÍ. Heildarverðlaunafé var 1.125.000 og skiptist það á milli 7 efstu sem hér segir:

1. Matte Bjarni Karjalainen, 400.000
2. Benedikt Óskarsson, 255.000
3. Sævaldur Harðarson, 160.000
4. Jónas Tryggvi Stefánsson, 110.000
5. Daníel Ingi Þorsteinsson, 85.000
6. Agnar Jökull Imsland Arason, 65.000
7. Jón Óskar Agnarsson, 50.000

Mótsstjórar voru Viktor Lekve, Már Wardum og Einar Þór Einarsson. Í störfum gjafara voru þau Silla, Sasa, Dísa, Rannveig og Guðmundur Helgi. Við þökkum þeim öllum kærlega fyrir vel unnin störf.

Við þökkum Poker Express kærlega fyrir samstarfið og að veita okkur aðgang að aðstöðu félagsins. Einnig þökkum við Coolbet fyrir að halda fyrir okkur undanmót eins og þeim einum er lagið.

Að lokum óskum við Matte til hamingju með glæsilegan árangur og hlökkum til að sjá félagsmenn á næsta móti, en Stórbokki verður reistur upp frá dauðum þann 7.maí nk!

ÍM í net-póker lauk rétt í þessu eða klukkan 0:21. Það var Óskar Páll Davíðsson (Goggarinn) sem stóð uppi sem sigurvegari eftir lokaeinvígi við Kristján Óla Sigurðsson (Hofdinginn2021). Í þriðja sæti varð síðan Ágúst Daði Guðmundsson (Gianthead). Þess má til gamans geta að Óskar Páll vann miða í Íslandsmótið í “FREEbuy” móti á Coolbet rétt áður en mótið hófst og lagði aðeins út €10 í add-on.

Alls tóku 56 þátt í mótinu, sem er fjölgun um 4 síðan í fyrra, og var heildarverðlaunafé €7840 sem skiptist á milli 8 efstu sem hér segir:

1. Goggarinn – €2509
2. Hofdinginn2021 – €1646
3. Gianthead – €1176
4. AndrewThomas – €792
5. SINGIS – €596
6. AstonWilli19 – €439
7. Hunterinn – €361
8. Piper28 – €321

Við óskum Óskari Páli til hamingju með sigurinn og þökkum Coolbet kærlega fyrir frábært samstarf eins og endranær!

Guðmundur Auðun Gunnarsson stóð uppi sem sigurvegari á Íslandsmótinu í póker sem lauk um kl. 20 í kvöld en leikur á lokaborðinu hafði þá staðið í u.þ.b. 6 og hálfa klukkustund. Agnar Jökull Imsland Arason varð í öðru sæti og Hjörtur Atli Guðmundsson í því þriðja. Þetta er í fyrsta sinn síðan 2017 sem Guðmundur Auðun tekur þátt í Íslandsmótinu en hann hefur lengi verið einn af okkar fremstu spilurum og er þetta hvorki meira né minna en í þriðja sinn sem hann kemst á lokaborð á ÍM í póker.

Alls tóku 90 manns þátt í mótinu að þessu sinni og er óhætt að segja að faraldurinn hafi sett þar strik í reikninginn enda var nokkuð um afskráningar á lokametrum skráningarfrests. Verðlaunafé var samtals 5.800.000 kr. og kostnaðarhlutfall mótsins 14,2%.

Verðlaunafénu var skipt á milli 15 efstu sem hér segir:

1. Guðmundur Auðun Gunnarsson 1.300.000
2. Agnar Jökull Imsland Arason 950.000
3. Hjörtur Atli Guðmundsson 730.000
4. Már Wardum 580.000
5. Hlynur Sverrisson 460.000
6. Dovydas Daunys 360.000
7. Ísak Atli Finnbogason 280.000
8. Sævar Ingi Sævarsson 220.000
9. Einar Þór Einarsson 180.000
10. Pétur Óskarsson 150.000
11. Jón Óskar Agnarsson 150.000
12. Kristján Óli Sigurðsson 120.000
13. Tomasz Kwiatkowski 120.000
14. Hafsteinn Ingimundarson 100.000
15. Gunnar Gunnarsson 100.000

Í 16. sæti varð síðan Wilhelm Norðfjörð og fær hann frían miða á ÍM 2022 en hefð hefur skapast fyrir þeim sárabótum fyrir “búbblusætið”.

Þeir Ísak Atli Finnbogason, Már Wardum náðu þeim góða árangri að komast í annað sinn á lokaborð á sínum ferli, en Ísak Atli vann Íslandsmeistaratitilinn árið 2017 og Már Wardum náði 3.sæti árið 2019. Sævar Ingi Sævarsson var í fjórða sinn á lokaborði sem er alveg magnaður árangur en hann varð m.a. í öðru sæti á ÍM 2018. Það er einnig gaman að segja frá því að þetta er líklega í fyrsta sinn sem tveir stjórnarmenn í PSÍ komast á lokaborðið, en auk Más Wardum formanns er Einar Þór Einarsson einnig aðalmaður í stjórn PSÍ.

Haldin voru tvö hliðarmót, 15K re-entry mót á laugardag og 20K re-entry mót á sunnudag. Í laugardagsmótinu var það Óskar Páll Davíðsson sem varð hlutskarpastur og á sunnudeginum tók Trausti Pálsson efsta sætið. Heildarverðlaunafé í laugardagsmótinu náði sléttri milljón og er það sennilega stærsta hliðarmót sem haldið hefur verið samhliða ÍM svo lengi sem elstu menn muna.

Við þökkum Poker Express fyrir gott samstarf við undirbúning og framkvæmd mótsins og fyrir að hýsa okkur í sinum glæsilegu salarkynnum annað skiptið í röð. Einnig þökkum við Hugaríþróttafélaginu fyrir ötullega framgöngu í undanmótahaldi. Coolbet á einnig ávallt skildar þakkir fyrir þétt samstarf við framkvæmd net-undanmóta að vanda. Það er óhætt að segja að undanmót þessara þriggja aðila hafi skipt sköpum til að tryggja góða þátttöku í mótinu en alls voru það 50 manns sem kræktu sér í miða á undanmótum.

Undirbúningur, skipulagning og mótsstjórn var í höndum Jóns Inga Þorvaldssonar, gjaldkera PSÍ, og í störfum gjafara voru Silla, Alexander, Dísa, Ásta María, Inga Kristín, Rannveig, Kristján Bragi, Bryndís, Bjarni Veigar, Berglaug og einnig greip Magnús Valur í störf gjafara auk umsjónar með hliðarmóti. Einnig komu Guðmundur Helgi og Már að ýmsum störfum við undirbúning og framkvæmd. Stjórn PSÍ þakkar öllum sem komu að framkvæmd mótsins með einum eða öðrum hætti kærlega fyrir vel unnin störf!

Magnús Valur sá einnig um textalýsingu frá lokaborðinu af sinni alkunnu snilld og hana má finna með því að smella hér.

Þótt stærsti viðburður ársins hjá okkur sé að baki er mótaárinu ekki alveg lokið. Íslandsmótin í net-póker verða haldin í lok nóvember og byrjun desember skv. áætlun í samstarfi við Coolbet og einnig erum við að gera það að árlegum viðburði að halda sérstakt mót fyrir gjafarahópinn okkar þar sem við krýnum “gjafarameistarann 2021”.

Að lokum þökkum við öllum félagsmönnum fyrir þátttökuna og sjáumst vonandi sem flest á næsta móti!